العودة   منتديات الحسيناب > ©§¤°^°¤§©¤ منتديات الحسيناب ¤©§¤°^°¤§© > المنتدى الأدبي

روائع الطمبور ....

المنتدى الأدبي

إضافة رد
 
أدوات الموضوع اسلوب عرض الموضوع
قديم 09-15-2011, 08:55 PM   #1
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي روائع الطمبور ....


مسافة السكة


غناء الأستاذ : صديق أحمد
مسافة السكة وأرجع ليك معاي الشوق وغنواتو
أنا البهواك وقلبي عليك وأنا الزول البريد ذاتو
**************
كنت بحدد الميعاد لو عاف متين أرجع
وكنت بقصر المشوار وأبقى مع الزمن أسرع
إلا مصيري في الأيام هي البتقول وأنا البسمع
وما لاقاني في الدنيا زولاً حظو كان فاتو
************
مسافة السكة مهما تطول برضو مصيري أرجع ليك
ألم شحن السنين الفات وأقيل في ظلال عينيك
أنا من سنين دنياي بخاف أحزاني ترسى عليك
وألم باقي العمر تحنان وأقول للناس حكاياتو
***********
ما يهمك كلام الناس وحاتك إنت ما ناسي
أنا البحسب عشان ألقاك ثواني الفرقة أنفاسي
عارف لوعتك يا روح وكيفن انت بتقاسي
أعمل إيه مع الأيام مع قلبي وصباباتو

احمد محمدنور غير متواجد حالياً  
الحسيناب في قلوبنا
عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا
رد مع اقتباس
قديم 09-15-2011, 08:56 PM   #2
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....



الله عاــــم يــــــــــا ...............؟


كلمات الأستاذ : إبراهيم أبو نعوف
أداء : عبد المنعم فارس


الله عالم يا حبيبة إنتِ في دنياي تمني
بيك عاد إشِراق صباحي وراح ظلام أحزاني مني
& & &
البمر إيه بي خواطر مرَّة لو سألوكي عني
دار تقول إيه لي عوازل لا تبارك ولا تهني
& & &
قولي ليهم حبو سامي وقصدو يبني معاك جنِّي
وفيها تاني يعود ربيعنا ويحضن الأزهار يغني
& & &
أحكي عن أول لقانا وكيف معاي سارت خطاي
وعن مقاطع شعري لمن مندفع بي فيض هواي
& & &
ومافي لحظة تمر بخاطري إلا أشواقك معاي
وكل أول ليه آخر إلا حبنا لا نهاية.
& & &
أحكليهم عن صلاتنا ونحن بينا صلات حميمة
كيف روتنا وظللتنا وأصبحت في سمانا غيما
& & &
لو تكون البينا عامري ياها جنتنا ونعيما
ومالنا مال الدنيا تاني أريتا ما فاتت جحيما
& & &
لو يقولو ليك خيالي وفي خيالي بقيتي صورة
أعذريهم ما بيعرفو إنت نور عيني وسرورة
& & &
لو يقولو ليقك أفراقك كيف تفارق القمرة نورة
إنتِ عمرك يوم سمعتي بالفراش هجرت زهورة
& & &
بكرة لو سألوك تاني كيف مع الدنيا وفراقا
قولي ليهم في قربنا وفي بعادنا نظل رفاقا
& & &
نحن ناس عاشت نفوسنا في وفا وأنبل صداقة
حتى في الأحزان بنفتح لي دروب أحزانا طاقا
& & &
أما لو سألوني عنك في هواك إيه الرماني
لا لا والله دة سِر مقدس كاتمو في الأعماق وأعاني
& & &
كل كلماتي وحروفي نظم أشعاري وبياني
إنك أنتي قطعة مني وبكرة راجع لي مكاني

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 08:57 PM   #3
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


فرحـــة المحـــــــزون

كلمات :ابراهيم ابونعوف
اداء الراحل المقيم : يس عبد العظيم



ضميني ضميني يافرحة ا لمحزون
لا الصبر قادر اطيق والضم معاهو سكون
**
يااعايشة في جواي بيك الفؤاد مليان
انا من بعيد جاييك شارد من الاحزان
غفلت قدري وجيت لاقيتي بالاحضان
لفيني في جيدك طوق والبسيني كمان
وريني كيف بيكون نبع الحنان في حنان
ما انت لي وانا ليك رغم البكون والكان
انا شاعر غناي في اروع الالحان
وانا بين ايدك فنان والفن جنون وجنون
**
شن داير اقولك عاد والقول علي تقيل
انا والنجوم شهاد من ديل اتابع ديل
تنهش كلاب الشوق في جوفي طول الليل
لامن لحقت الموت والموت اباني عديل
يوماً يلمني فيك يوماً صعب بالحيل
كترتلو التحنيس كملتلو الوسيل
حلفتو بالقرآن خسمتو بالانجيل
ناديتو في سجين خيل رجي الممكون
**
ولهان عليك قليب بهواك بحبك موت
صبرتو بالآمال صبراً غزلتو خيوت
عشان مايميل للغير كرهتو في البنوت
سكتو بالاحلام ختيتو في تابوت
رهبنتو ليك رهبين فوتو فوق الفوت
حفظتو ذكر الريد بعبد منيب يوت
لامن بقالو كلام لامن بقالو سكوت
نذراً علي مثبوت الله يكون في العون
**
سامحيني كان ذليت وكلامي ما ارضاك
الناس تسامح الناس وانت السماحة براك
يارقة الحلوين ياقسوة القساك
بيت ذاتك اتوسل طالب عفوك ورضاك
مديلو حبل الريد قويهو من تالاك
خليني أكون عايش علي انو يوم ألقاك
**
يبقي السعد يصدق تشبك يداك يداي
وأشواقي لليوم داك يوم يقعد المأذون
ضميني ضميني يافرحة المحزون
لا الصبر قادر اطيق والضم معاهو سكون

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 09:00 PM   #4
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


حكاية الشافعة البريدة

كلمات الاستاذ :ابراهيم ابنعوف
غناء الراحل المقيم : يس عبد العظيم


كيفن أصـــبر قليـــبى
وكيفن أعمــل حسابى
ما دام عشمى فى نظـرة والعندو النظرة مابى
بجرو غنايا أحكى ليكم تعالو أسمعـوا يا صحابى
حكاية الشافعى البريده وريده شقــــايا وعذابى
أحن لها حن القمارى تقوقيبـه أوتار ربابى
وأهوى الهوى فى هواها وهواها قرايتى وكتابى
منو القال ليكم عقلتَّ وحاتكم جنيت يدابى
بقيت لمن ليها فارق أفارق عقـلى وصوابى
أضيق لمتين ليها أرجع أخاف مايطولبى غيابى
أعاين زين فيها أشبع وأزيد إعجاب على إعجابى
أشرّق وين ما أغــــــرِّب وأشيـــل همى وإكتئابى
محل ما أمشى ألاقــــى طيفه مشتت فكرى وحجابى
تطير روحى بعيتً تغــــــازل خدودك زهر الروابى
تتعلق بين عيونه ورموشــه البى فوقا كابى
قليبى يفارق ضــلوعى يلاهى عشانا ويشابى
بعيد مابيقـدر يقاوم بريق البسمة السحابى
صديراً لما يتفـرَّ تبق نار الله فى أعصابى
وقديلتاً كيتن على وا نشاف ريقى وخم ترابى
حنينى ومرات بتقسى تقول فى نفسها تتغابى
إتغابى العرفة فيهو وا زرف دمعــــى ووا خرابى
صحيح أصبحت مملوكاً أســوّى أورادى وأزنابى
متل ما ملكت فؤادى أنا ملك شيطان الكتابى
أخاف ما بقـدر أعاتب أقول تزعــل من عتابى
أموت أحسن من هى تزعل أو تزرف دمع كابى
عشانا أنا كم ضُقتّ مـــرَّة عشانا مهمل عقابى
عرفت الله فى عـــــذابك إنتّ خاف الله فى شبابى

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 09:10 PM   #5
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


أوعـــــــــــديني


للشاعر ناصر محمد محجوب
غناء معاوية المقل


اوعدينى يطل صباحك
لو ليالى الغربة طالو
وسدينى حنان قليبك
استريح وارقد قبالو
صبرينى الصبر ضايق
مابى تتمد حبالو
صدقينى بكيت فراقك
فى الليالى دموعى سالو
أرحمينى أسير سجونك
راضى حكمك مهما قالو
صارحينى انا لو قليبك
لى اصلو بعيد منالو
ذكّرينى أيام بلدنا
يا حليل ايام شمالو
فرّحينى وقولى باكر
نشتل الريد فى رمالو
عاهدينى شتيلو يروى
مقيلنا يبقى تحت ظلالو
كلمينى سمح كلامك
عن قليبك ورى حالو
حدثينى عن المحنه
وعن نخيلنا وعن جمالو
اعذرينى الخوف عواصف
والزمن خايف نبالو
احتوينى قليبى عاشقك
يبقى حلم الذّنيا نالو

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 09:12 PM   #6
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


للشاعر: السر عثمان الطيب
غناء : محمد جبارة

شوفي الزمن يا يمه ساقني بعيد خلاص
جرعني كاس
در درني واتغربت وتعذبت
يايمه وريني الخلاص
يا يمه يا نور الصباح وكتين يطل
يا يمه يا بدري البشع دايماً يهل
يا يمه يا فيض الحنان الما كمل
وآشري يا زينوبة ولدك في بحور الشوق كتل
محروم من الحب والمحنة وراك همل
يا يمه يا نغماً حنين بالشوق يرن
وأفكاري فيهو بيرتعن
دمعاتي شانو بينزلن
واتذكر يا يمه في الدغش النسايمو يهبهبن
قايمي الصباح متكفلتي شايلي الحليلي علي المراح
جبتي اللبن بي انشراح
والساعة ديك يا دوب ديكنا بدأ الصياح
والطير صغاروا يغردن
واتذكر يا يمه في وساعة الهجير
صالاك نار الدوكي عستيلنا الفطير
رشيتي قتي أكلوهو خير
واتذكر يا بسمة الطفل الغرير
وكت الخلوق ترقد تنوم وأسهر براي
أرعي النجوم
والشوق يرف جنحيهو بي فوق لي يحوم
وأهتف باسمك في الخيال
طيفك كمان بي فوقي جال
وأتمني لو لحظات يدوم لكني فجأة ألقاهو زال
يا يمة يا بحر المودة وكتين يفيض
يا يمة يا شعلة أمل زادت وميض
يا يمة يا عنقود كلام منظوم قصيد
واتذكر يا يمه ساعة الناس يجونا من البلد
ناعم ترابها علي جسيماتم رقد
ريحة التمر فوق الهدوم
ولون الخضار خانس لبد
والشوق أواري بيشتعل
كان ظني فيهو يكون خمد
واتذكر يا يمة والناس قالوا قايمين البلد
رصوا الهديمات عدلوا ركبوا اللواري وقبلوا
خلونى وحيدى بلا انيس
كيفن إنفرادى إتحملوا
شالوا السلام انا مني ليك
يايمه ساعت يوصلوا ويقولو ليك
شفناه فى بلد الأمان
يايمه رسلى لى عفوك
ينجينى من جور الزمان
يايمه رسلى لى عفوك
ينجينى من جور الزمان

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 09:47 PM   #7
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


الشاعر الهرم (خالد شقوري

يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
***
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
***
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت مسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
***
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
***
ارجع يا زول ارجع غير ارضك عاد ما بتلقى بطاح
شن داير في بلداً والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياعه يقول افراح افراح زي البيقول تفاح تفاح
***
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
***
وين تلقى الفرحة وتتهنى في داراً ضيقي ومافي براح
جم ناساً من عين العطشان تخطف ومضات البرق اللاح
***
سايب اهلك ونخلك راحل قول وين ماشي ووين آصاح
الشمس النايري ابت تطلع النيل يا زول اصبح رحراح
الضل قصر ما غتى رويس ولداً ساكب عرق الكتاح
الواطة ابت تديك الخير ولا انت عليك ما هابي رياح
***
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
***
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناساً واقفي صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوف

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 09:50 PM   #8
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


ضل الغيمة
ضــــــــــــل الغيمــــــــــــه - محمـــــــــد جـــــــــباره


ضل الغيمه غش قليبي قال ينجمّ خت رحالو
فات خلاهو للكان ظنو في عز الهجير يرتالو

عاد وريني ليه يا غيمه ماك عارفي السفر وأحوالو
ولا قليبي تحتك حالفي ما يطيبلو المقيل يحلالو

ضلك من بعيد يا غيمه كان دايماً بيتمارالو
جافل منو لكن برضو كان عاقد عليه آمالو

جاييك من بعيد يا غيمه قاصدك داير يريح بالو
والله لحظات بس يعيشهن هاني تحتك زي عُمر تبقالو

فاكرك والهجير يا غيمه صاليهو مبشتن حالو
ولا بي تحنان تحضني عليكِ تمسحي منو دمعات سالو

إنتِ لو كان ليكِ قلب يا غيمه عاشقك فات رحلبو شالو
ولا كان واديك دمعك رشّ كترت عربو في حلالو

مادام فُتي آه يا غيمه قصدو الدايرو ما تمالو
ولا شن الحارسو باقي وراكِ مادام غرزو تب ما نالو

بالليل والنهار يا غيمه ناوي يقوم علي ترحالو
وحده خلاص يواصل تاني مشواراً كتير يهوالو

قوليلو الوداع يا غيمه لو كان في الوداع يلقالو
ولا حبة زاد يشيلا معاهو في سفرو ليالي الطالو

داير يوصيكِ هاك يا غيمه لي زولاً قبيل غنالو
ولا تمشيلو توصفي ليهو كيف جمر الغرام سوالو

كيفن بُعدو آه يا غيمه تب في الدنيا ما خلالو
ولا غير جرحاً يزيد إيلامو كل ما صحبو قالوا وقالوا

غير بيت من قصيد يا غيمه يفرِح حتى لي عُزالو
ولا مهما سو فوقو وجابو زادولو الملامه وكالو

غير طيفو الحبيب يا غيمه في دنيا العذاب هلالو
إتذكر زمانو الولى رقّ قليبو تب حنالو

غير قيداً خلاص يا غيمه معقود وإنعدم حلالو
والله رغم البيهو قولي ليهو ما فارقت لحظه خيالو

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 10:20 PM   #9
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


مشــاوير الفــرح
عبدالله محمد خیر

غريبة ما بكت العيون في يوما داك ..!
لما انكتم نفس القليب
الكان بشيل هوا من هواك
***
تاهت خطاوي عليك من قبل الوصول
وقفت هناك .....
***
ورثت من الزمن الصبر
ممهوله ما صبقت خطاك
مع إنو يا القمر الملجلج في سماك
أطول مشاوير الفرح كانت معاك
***
مبهورة ما بكت العيون
مسرورة للفرح الملاك
معصورة بالحزن الدفين
مغمورة بي فرحة لقاك
مسحورة بالحسن الرزين
مأمورة تنظر لي بهاك
مكسورة تخفيه الحنين
مجبورة ما رادت سواك
محصوره في الوجه الحسين
ياصورة أجمل من ملاك
***
وغريبة إني وقف أمام عينيك
وما إنهارت قواي !!!
اتجمعت كل المعاني السامية
ديك اللحظة واتحدت معاي
غاية رجاي .....
قيمة وفاي .....
معني غناي .....
وتمن شقاي .....
يامن وهبتك كل ما مضي
من شبابي ومن صباي
أنا هل ظلمتك ؟
أم ظلمتني ؟
لما سبتك لي سواي
***
لي حكمة ما بكت العيون
الشاخصه في وجهاً جميل
حافـــــظ نــــــداي
والليلة كاسيهو الشحوب
في يوم زفاف خاصم هواي
كان صاغيه لي صمت العيون
الكان بردد يا ضناي

احمد محمدنور غير متواجد حالياً  
الحسيناب في قلوبنا
رد مع اقتباس
قديم 09-15-2011, 10:22 PM   #10
احمد محمدنور
المشرف العام


الصورة الرمزية احمد محمدنور



احمد محمدنور is on a distinguished road


إرسال رسالة عبر Skype إلى احمد محمدنور
افتراضي رد: روائع الطمبور ....


بلاد الشوق
الشاعر : خالد الباشا


مشيت بعدك بلاد الشوق .. غشيت في سكتي الأطلال
لقيتك لسة في الخاطر .. وفي مرقة شمس باكر ..
ملان بيك طول حياتنا جمال
رسومات روعتك تذكار .. علي ابواب بيوت الحي ..
محل تاوق .. لقيتك شوق .. مشتت في الشوارع ضي ..
اماسينا البتسهر بيك .. نجيماتنا البتشهد لي ..
وراك لاجفن الدمعات .. ولا اتلاقن رموش عيني ..
اونس بيك نصايص الليل .. احجيك دندنة وموال ..
سألت عليك براي النيل .. تميراتنا وعصيفير الهوى الصداح ..
لقيتك في عيون الناس .. حنين ساكن القلوب مرتاح ..
بتطلع من حكاياتنا .. وخيالاتنا .. بعيد شايفك رهاب رحراح ..
انادي عليك شموس تمرق من الواطه .. قلوب بيضا .. شعاع وصباح ..
يبق نورك مع الفجاج .. علي النخل العزيز وطوال ..
اتاريك إنت كلنا بيك .. بلاك نحن وبيوتنا شجن ..
تموت سيرة الفرح نبكيك .. نتوه مانلقى لينا وطن ..
جناينا وضرانا الفوق .. قمارينا وحسيس القوق ..
رحل كل البلد وياك .. نزل جواك .. حنين وسكن ..
وأنا ( الكاتلني ) من يومداك .. علي عينيك عيوني بكن ..
اقالد ذكرتك جواي .. وأعيش باقي العمر رحال ..
سلامات وين نزل محياك ... تحياتنا وأمانينا ..
اكيد باكر نجي ونلقاك ... قمر باهر أماسينا ..
تبل شوق القلوب ترتاح .. علي نمك غناوينا ..
(لدايات) شايك الرماي .. مزاجات قهوتك جواي ..
احاسيس فيني تتحكر .. جمال نيلنا وعصارينا ..
نضاريك في العيون تظهر .. بريق لهفة ودمع هطال ..

احمد محمدنور غير متواجد حالياً  
الحسيناب في قلوبنا
رد مع اقتباس
إضافة رد

أدوات الموضوع
اسلوب عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 11:11 AM.


Powered by vBulletin® Version 3.8.5
Copyright ©2000 - 2014, Jelsoft Enterprises Ltd
::×:: جميع الحقوق محفوظة لشبكة ومنتديات الحسيناب ::×::
الآراء المنشورة ليس بالضرورة تعبر عن رأي إدارة المنتدي

a.d - i.s.s.w

SiteLock