العودة   منتديات الحسيناب > ©§¤°^°¤§©¤ منتديات الحسيناب ¤©§¤°^°¤§© > المنتدى الأدبي

الحسيناب ..اسفارهم و اشعارهم

المنتدى الأدبي

إضافة رد
 
أدوات الموضوع اسلوب عرض الموضوع
قديم 01-21-2011, 10:12 PM   #1
عبدالرحمن الحسينابي
عبدالرحمن الحسينابي

الصورة الرمزية عبدالرحمن الحسينابي



عبدالرحمن الحسينابي is on a distinguished road


افتراضي الحسيناب ..اسفارهم و اشعارهم



ايها الاحباب ...لنحاول ان نبدا البحث عنهم.....ليدلي كل بدلوه حتي تكتمل هذه الموسوعه.......

ابناء حسين الكبار(ابراهيم..ابنعوف..سعيد..) هم اول من عرفنا انهم سافروا من الحسيناب الي جهات مختلفة بحثاً عن العمل...اما عبيد اخوهم الاكبر و عبد الهادي اخوهم الاصغر فانهما لم يبرحا القرية حتي تاريخ وفاتهم...وقد اورد الرواة عن عبيد:
متين ياريش تقوم نتعلم الطيران
نشيل ناس ابنعوف البيتو سوق اخوان
نفوت ناس ابرهيم ما غلط الجيران
علي جرحاً شديد مابيعرفو الجنيات
منوسر في الكبد مو بره لي دويات
يجي ابمالك يحن متل البل الغابات
يجي اب محمود بلا مطر الخريف شتات
قال :اب مالك هو ابنعوف...وتوفي قبل مولد ابنه الاصغر محمد مالك بعشرة ايام......و اب محمود هو ابراهيم...و توفي محمود صغيراً...و اما الجرح الذي يعنيه فهو وفاة شقيقهم الاصغر عبد الهادي و حال اطفاله اليتامي من بعده و ايلولة كفالتهم اليه.وفي ذات السياق يقول جدنا عبيد: : ..سامعين سامعين الحرد ما جيتو عارفين الكره ماجيتو......ان ما جا ابنعوف لي بيتو وان ما جا ابرهيم ضميتو تبن ضهري خف لقيتو صابون البسيري طريتو .....................!!!!!!!!!!! ..وقد روي لي عمنا محمد مالك عن ابناء عبد الهادي هؤلاء فقال ان المهدي اطال الله عمره كان اصغرهم.......و كان عمه عبيد رجل لين القلب ..ومع كثرة ابنائه و زوجاته اغدق علي ابن اخيه حتي انه اول من اكل الدجاج المحمر ..و شرب شاي اللبن و كان السكر لا ينقطع عنه حتي صار يضرب به المثل في الدعة و حسن الحال....
قال عتمان ود الامين(عتمان محمد الامين) مخاطباً عباس سعيد:
هملتك يا العباس
يا ولدة النعاس
ما شفت ود الناس
يغير في اللباس
و السكر راس بي راس..
وود الناس المعني هو حاج مهدي ...وكان ذلك بعد وفاة نفيسة محمد فضل والدة عباس...وقد ابدي عتمان هذا تعاطفاً مع عباس دون الاخرين لانها تركته صغيراً :
عباس صغير داير الحساني
و الراس مشعنف داير الزياني
نفيسة روحت مو راجعي تاني.!!!وسعيد كان رجل قران...سافر الي القطينة(و الكلام لمحمد مالك) واتخذ له قطية و زرع حولها النخيل..ثم عاد بعد ذلك الي الشمالية في اخر ايامه و تزوج ب(عائشة بخيت) من العرماب عرب البحر ..وهي التي عناها عتمان نصير عباس بقوله......(عشوشة اتقلبن حديسا و علي التمرات جاري كيسا.....ترتب في حراريسا و سناحتك يا ود نفيسة).. اما ابراهيم فقد كان يعمل في البنيان و سافر الي جيهة الزياداب.....وهو توجيه قوله:
يا طير ان مشيت سلم علي الامات
قول لام الجزولي القاعدي في الدانقات

نحن قاعدين في الزياداب في ضري طلحات.....!!!
تعجبيني انت وقتين تنهمي الفرخات
عاضات الصبر لامن شبابن فات
لاجابن جماعة ولا حكومةً جات
وام الجزولي هي سرورة بت الامين...و الفرخات جمع فرخة و هن جواري ذلك الزمان....و لعلك تجد الاشارة الي تاريخ منع الرق و خوف الناس من تبعات ما بيمينهم من الارقاء...ولا ندري هل كان ابنعوف برفقته ام كان في مكان اخر..

عبدالرحمن الحسينابي غير متواجد حالياً  
الحسيناب في قلوبنا
رد مع اقتباس
قديم 01-21-2011, 10:57 PM   #2
ابوبكر

الصورة الرمزية ابوبكر



ابوبكر is on a distinguished road


افتراضي رد: الحسيناب ..اسفارهم و اشعارهم


العزيز الحسينابي
التحية والتقدير
هذه الاسفار في اسفار الحسيناب واشعارهم نرجو ان تتواصل
كما نكون سعداء وشاكرين ان استطعت التاريخ ولو علي سبيل التقدير

ابوبكر غير متواجد حالياً  
الحسيناب في قلوبنا
عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا
رد مع اقتباس
قديم 01-22-2011, 08:55 AM   #3
الملهم

الصورة الرمزية الملهم



الملهم is on a distinguished road


افتراضي رد: الحسيناب ..اسفارهم و اشعارهم


فليتواصل هذا السِفر الخالد

الملهم غير متواجد حالياً  
الحسيناب في قلوبنا
رد مع اقتباس
قديم 01-22-2011, 01:25 PM   #4
عبدالرحمن الحسينابي
عبدالرحمن الحسينابي

الصورة الرمزية عبدالرحمن الحسينابي



عبدالرحمن الحسينابي is on a distinguished road


افتراضي رد: الحسيناب ..اسفارهم و اشعارهم


شكراً الاخوة منقة و الملهم........لكن انا داير المساعدة اولاً و محاولة البحث عن التواريخ بدقة لا تخلو من ادعاء لا نريد ان نختطه...لكن علي المحاري....غير ان هناك تواريخ محددة سنوردها في حينها....مع الشكر و الاحترام.....
ثم دخلت سنه 1910..و فيها تمرد(حاج ود فضل) علي مهنة ابائه التقليدية حيث كان يعمل تربالاً مع عمه يس ود احمد.......قالت الراوية: هو محمد بن فضل بن احمد بن فضل بن محمد بن حسين...المولود حوالي 1875 و امه الروضة بنت الحاج محمد نور بن الحاج محمد طه....اخته لامه عائشة عتمان محمد الامين...و ليس له اخ او اخت غيرها... و في سنه 1910 التحق بمدرسة التمريض بالخرطوم و تخرج منها و عمل بالحقل الطبي بمستشفي الخرطوم و هو الذي زرع اشجار النيم الضخمة تلك التي بالمستشفي...قال رحمه الله ان الحدود الجنوبية للخرطوم كانت سكة حديد..و شمالاً سراي الحاكم العام وغرباً حلة المقرن و كنا نسكن فيها و شرق الخرطوم قري بعيدة و مابين كل ذلك غابات تعج بالذئاب و الضباع...و لا يستطيع من يتاخر بالمستشفي الذهاب الي منزله....ثم عمل بشرق السودان _كسلا- و القربه...و بالشمالية..و بالصحراء بين حلفا القديمة و ابي حمد. و كوستي......قال نقرتين لعرض الصورة في صفحة مستقلةكان طه ود احمد شاعراً مقلاً ربما قال البيت و البيتين....ومن مثل ذلك (....الحبيب في كوستي طول****وفارق الحبان والاهل.....) يعني ود فضل) و كذلك كان حاج العاقب( محمد ود فضل قوماك لاهلنا**قعاد الغربة مو حق للمتلنا!!!).و نزل المعاش سنة1940..و عمل بالمشاهرة حتي سنة 1945 و ظل يداوي الناس من القرية و القري المجاورة حتي سنة 1978.. توفي في كامل وعيه و تمام عقله وحواسه بالحسيناب سنة 1985..
قال الراوي: سافر ود فضل من الحسيناب الي الخرطوم قبل سنة 1910 و سكن في حلة ديم القنا في جنوب الخرطوم و دخل بعد ذلك الي التمريض و ارسل لعمه يس:
فشودة اتفكينا منك وليد الديم راجا اظنك
حليمة و مكه يغشنك وبناتاً سمحات يجنك..
قالت :هن بنات الحاج....!!!! و فشوده الساقية المعروفة....
ثم صار بعد ذلك من السكاكة .....(الاسم الذي صار يطلق علي المسافرين حتي وقت قريب... ) واشتهر بعد ذلك ب (ودفضل الحكيم) و ترك الناس حتي الكبار منهم اسمه القديم...ومما جاء في مرثية ود احمد الخمجان لاخيه يس 1937:
ودفضل الحكيم قام جانا خل حقنتو واتلقانا
من وين الفرح يغشانا طال يا ام الصباحي بكانا..
و من قصيدة حاج ود عمر الصغير:
ودفضل خليناك براك
سو ابارك بيعك وشراك
نادي حاج العاقب معاك
الفقر في بيتو مو راك...!!
وبحكم هذه الوظيفة الكبيرة فقد كانت ترجو منه قريباته من النساء ما ترجو الام من ابنها و الاخت من اخيها ولم يكن بمقدور الرجل ذلك ......مما جعله هدفاً رابياً لالسنه الشاعرات منهن....... .
قالت خالته عائشة بنت الحاج محمد نور قد زارته بحلفا القديمة فلم يرضها الحال:
محمد ابو الصباحي مابيسلم من اللوم
التقول مو صاحي مابيسلم من اللوم
الاحمر الفلاحي مابيسلم من اللوم.
القصير الفرجي مابيسلم من اللوم
الحكيم مو تمرجي ما بيسلم من اللوم..
و مما قالته فيه وهي تعاتبه بجد:
قالي وقت جيتي كيفنك....بحر النيل اخير منك
وين غداك وين عشاك
اجار الباجور كفاك..ورينا حفيرة قفاك
ان كان المولي اداك
كنت ابركد معاك........
امش كوسي وليدات حشاك.....
وقطعاً لم يقل لها ذلك و لكنه العتاب و المبالغة في اللوم.....!!!! بحر النيل خادم يس ود احمد ......
ومنها:
اللوم لي محمد...وان اللوم لي حاج محمد
خسارة خالتو الجاتو تشحد
انا اجيت متل الكليبي
انا الصديت فوق دريبي
خسارة خسارة يا شيبي

وليس ببعيد كلمة الحاجة عاشة عتمان و هي تهدهد ابنها البشري:
يا البشري ما عندك ضهر..
يا البشري لا راس لا قعر...
يا البشري كان تقع البحر....!!
ولا تعني احداً بهذا الكلام غير ود فضل الحكيم....
قال: كان ودفضل الحكيم يعود من اسفاره شمالاً و جنوباً علي طهر باخرة صغيرة جميلة ترسو عند(راس الجزيرة) فينزل منها ود فضل....و قد ظلت هذه الباخرة تمخر النييل شمالاً و جنوباً حتي بعد استقرار ود فضل بالقرية و نزوله المعاش و حتي اواخر السبعينات...و الناس مجمعون علي ان اسمها (بابور الحكيم)
هذا و بالطبع تظل الحاجة مريم يس احمد هي اول زوجة موظف تسافر
من الحسيناب بصحبة زوجها الي بقاع السودان المختلفة....قالت الخالة السرة بت يس رحمها الله (توفيت وليس لها ابناء):
خالتك ياحمد الضو يا حليلا
يا حليل بت امي سكنت سبعة كيلا
بت ام العبيد كر من جفاها
الخلت اخيها و تبعت جناها
مالا ما طرت الصغيرين الوراها..؟؟
العبيد المعني هو عبد المحمود يس....والصغيرون المعنيون هم عبد المحمود و امنة و السرة......
هذا والحاجة مريم نفسها تقول:
يا صباح الخير حليل حوش القصيبة
يا صباحي براي حليل امي الحبيبة
لي لا كوراك و لا صايحاً يجيبا
..........
يا صباح الخير حليل ناس عبدو خالي
يا صباحي براي حليل امني الحتالي
دي بلداً لا حطب و لا فيها والي
انا عدوي البابا كلو بقالي غالي.....!!!
.......
يا صباحي براي حليل يسن ابونا
يا صباح الخير حليل عبدو و امونه
يا زعم..ناس امي ستنا ما طرونا..؟؟؟
.......
قالت الراوية؛ حوش القصيبة هو حوش صالح ود فضل .....و عبدو خالي (عبد المحمود) و هي تتكلم بلسان الصباحي و هي تهدهده....و امني الحتالي هي امنة يس....و امها الحبيبة هي زينب ود حسين....توفيت , واختها زينب ود حسين الصغري(زينب ود احمد)و اما (امي ستنا) فهي زوجة الشيخ ود حسين ووالدة فاطمة بت المدني والدة ابناء عبد الله ود عمر.....
رحم الله الاحياء و الاموات من ابائنا و امهاتنا....
فوائد:
هذه الوقائع حدثت و لم تتوفي زينب بت ود حسين الكبري والدة ابناء يس الكبار...و بالتالي قبل زواج يس بزهراء بت ود حسين ام ابناء يس الصغار......(زينب.. عبدالرحمن ..طيبة..احمد.)اذ لا يمكن الجمع بين الاختين.....و بالتالي فالصباحي محمد فضل ولد قبل زواج والدة ابناء يس الصغار و قبل وفاة والدة ابناء يس الكبار...!!
و الفائدة التانية هي ان مريم هي اكبر ابناء يس.... و امني هي اصغر ابناء يس الكبار.....
مع الشكر و الاحترام....

عبدالرحمن الحسينابي غير متواجد حالياً  
الحسيناب في قلوبنا
رد مع اقتباس
قديم 01-22-2011, 08:59 PM   #5
عبدالرحمن الحسينابي
عبدالرحمن الحسينابي

الصورة الرمزية عبدالرحمن الحسينابي



عبدالرحمن الحسينابي is on a distinguished road


افتراضي رد: الحسيناب ..اسفارهم و اشعارهم


ومن اوائل الذين سافروا سفراً طويلاً جداً صالح ابن فضل بن محمد ود حسين... امه الزهراء بنت الحاج حسن شقيقة الحاج محمد طه المكنية ب (يمه فاطني) عاشت زمناً طويلاً و لها الفليل من الشعر....خرج من الحسيناب و لم يعرف له مكان حتي عرف الناس انه بغرب السودان ويعمل بتجارة الرقيق....و يزعمون ان له زرية بمنطقة وادي صالح بدارفور...و ان وادي صالح نفسه سمي عليه و لم اجد لذلك سنداً.....وكان من عادة الرجل اذا سافر الا يعود حتي يذهب اليه شخص من اهله رجلاً كان او امراة و يعود به الي الديار..
وصالح شقيق الشيخ (ود حسين) و هو القائل في شأن اخيه:
يابا الشيخ اللينا قريب ويا الكباشي و ابوي الطيب
عندي حبيباً لي متغيب يا تور ناوي تقول لي طيب
يابا الشيخ لا تنسوا تغفلو اتولو اليرجع لي اهلو
يا الصلاح اهل الاسرارا يا حسن الراقد في بارا
اقلبو الحلي هويد و عمارة وكان الخال باقيلنا جبارة
رمشة عين جيبوه عجالي من دارفور بلد الدجالا..
و الخال المعني هو محمد طه بن الحسن المعروف بالحاج حمدطه و الحاج ود الحاج حسن.....وهو فقيه مشهور و به كان الناس يتبركون و يستنجدون به من المهالك كلها......(يابا ود الحاج حسن تور الدويمي ****غريب الدار سليمان فوق نعيمي
جناح جبريل يضاري يضلو غيمي***** الصعيد لا حدو كلو سلم سليمي..)
و اخيراً سافر الشيخ ود حسين الي دارفور و عاد باخيه صالح شيخ طاعن في السن و رجله مصابة بالغرغرينة وما ذال طريح الفراش حتي توفي بالحسيناب....وقد جلب معه خلقاً كثيراً من الارقاء وقسمهم علي اهله غفر الله له...
اما الشيخ ود حسين فيقال انه بعد سفرته هذه سافر الي الحج مرات عديدة يقال انها بلغت سبع مرات....و توفي بالحسيناب سنه مرض البقر 1937...ولم ينجب صالح غير ولد واحد هو الجزولي عليه رحمة الله...ولا ادري توجيه قول ودعمر عليه رحمة الله:
رقد يا ود حسين رحل الحديد***وفتر صالح رقد لحماً مديد
ابو عبد الله في هماً شديد**** كسرت الساقي يا ابراساً قليد...
الا يعني ذلك ان ود حسين وهو اصغر اخوته مات قبل صالح..؟؟؟و هو من اعاد صالح مريضاً..؟
ارجو ان يفيدنا العارفون بذلك...

عبدالرحمن الحسينابي غير متواجد حالياً  
الحسيناب في قلوبنا
رد مع اقتباس
قديم 01-23-2011, 05:16 AM   #6
الفراهيدى


الصورة الرمزية الفراهيدى



الفراهيدى is on a distinguished road


افتراضي رد: الحسيناب ..اسفارهم و اشعارهم


ما أروعك أيها الحسينابي
هنا ـ بين جنبيك ـ دُفِن نصف مجدنا وتاريخنا أو كله
وهذا أول الغيث
ونحن موعودون بخريف خيرٍ وبركة
الآن إبتهل لله أن لا يشغلك شاغل
ويمنحك الله الصحة والعافية
فنرى تاريخنا سِفر بين الأسفار


أعانك الله وسدد خطاك

الفراهيدى غير متواجد حالياً  
الحسيناب في قلوبنا
عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا
رد مع اقتباس
قديم 01-23-2011, 10:21 AM   #7
الشايقى


الصورة الرمزية الشايقى



الشايقى is on a distinguished road


إرسال رسالة عبر Skype إلى الشايقى
افتراضي رد: الحسيناب ..اسفارهم و اشعارهم


المفضال الاستاذ عبدالرحمن عبدالباقى

اطلعت على سردك التاريخى ---- وتنامت لذهنى ---مقولة التاريخ كل الحاضر والمستقبل ---
ارجو صادقا ان تجمع هذه السير ---بكل اشجانها --اتراحها افراحها---مراراتها ---اشراقها --فى سفر جامع (يطبع ويحفظ بالكيفية المقترحة )
بحسبة بسيطة ---- عقب انقضاء عقدين من الآن ----ستتمدد هذه الشجرة ( آل حسين) لتصبح اعظم عدد وعدة ----وبعد نصف قرن ---ستصبح قبيلة
وستحتاج الاجيال القادمة ---لسراج يضىء السير والاخبار

ولعبر تهدى الباحث والتائه والمتفاخر ---باصل طيب ---نضر

الشايقى غير متواجد حالياً  
الحسيناب في قلوبنا
عزيزنا الزائر لن تتمكن من مشاهدة التوقيع إلاَّ بتسجيل دخولك
قم بتسجيل الدخول أو قم بالتسجيل من هنا
رد مع اقتباس
قديم 01-23-2011, 10:37 AM   #8
عبدالرحمن الحسينابي
عبدالرحمن الحسينابي

الصورة الرمزية عبدالرحمن الحسينابي



عبدالرحمن الحسينابي is on a distinguished road


افتراضي رد: الحسيناب ..اسفارهم و اشعارهم


بين سنه 1910 و 1933 بدات تسافر من الحسيناب اجيال بكاملها بدل الفرد و اخيه........و اجتمعت هذه الاجيال بمناطق معلومة لممارسة مهن او وظائف معلومة فظهرت ثقافة المراسيل و الجوابات.....
و اقول بين سنة10 و سنه 1933 لان هنالك وقائع بعينها وقعت في او حول هذه السنين...ففي سنة 1916 تزوج جدنا حسين سعيد بزوجته الوحيدة فردوس عبيد حسين....قال لي رحمه الله ان الفيضان رحلهم من منازلهم اربع مرات....سنة 17 و انا و امك فردوس عرسان لينا سنة....و سنة 1937....و سنة 1946....و سنة 1954 و كنت اتمني ان اهاجر هذه المرة من هنا الي الاخرة......لكن ها هو فيضان 88 يرحلنا للمرة الخامسة......للخلاء هذه المرة.......
علي اثر زواج حسين سعيد هذا خرج من الحسيناب جدنا عبد اللطيف ابراهيم عليه رحمة الله مغاضباً الي شرق السودان ...دلتا طوكر و عمل بالزراعة....و امامة المسجد....ولم يرجع الي الحسيناب الا في اواسط السبعينات وهو شيخ طاعن في السن....و توفي الي رحمة مولاه في (1981)اثر شوكة (سعفاية تمر) اصابته في احدي عينيه.......و اما رفاقه في طوكر فكان علي راسهم جدنا عبد الباقي ابنعوف حسين محمد.......و امه هي طيبة بنت فضل ..كانت شاعرة يشار اليها بالبنان وهي التي قالت :
الله يعلم والناس تشوف
ما بفرحا بت الخروف
وما بخلي خزيني ابنعوف
....وزوجته الوحيدة الي يوم وفاته حرم محمد فضل المشهورة بحرم المدينه.....قيل انه سافر سفراً طويلاً و ترك زوجته تلك حبلي بابنها (ابنعوف) و لم يعد الي الحسيناب حتي بلوغ الطفل سن التمييز......وفي ذلك كانت زوجته ترفع الامر كله لله:
انا حمدت المولي حمداً ما جحدتو
لا ناس ابنعوف الما حضرتو
بقي يرعالي الغنم و قفز تمرتو..!!
.........
قال:كان بصحبته هناك ابن اخيه(عبد الباسط مالك) و تزوج بابنته الكبري (فاطمة ) توفيت في الوضوع سنة 1933 فتزوج بعدها ست البنات....وهي نفسها كانت مقيمة هنا بالحسيناب...و كثيراً ما خاطبتها امها:
فاطني ابوك يوم نوي للقيام
في خلا طوكر قال سلام
فوقو ناس المهدي الامام
*******
فاطني ابوك اتحوي الجبل
لاهو طفلاً شايلو الجهل
لاهو دهشان طبعو العجل
****
كان مرادي قعاد الاهل
كان قعد في ساقتك شتل
****
يا اب محمد صادني البغر
الا حكم السيد مقدر
..******
اب محمد ما عندو زول
مالو هو ان كان قعد الرسول
يا عشاي حكم الله مقبول....

عبدالرحمن الحسينابي غير متواجد حالياً  
الحسيناب في قلوبنا
رد مع اقتباس
قديم 01-23-2011, 10:10 PM   #9
عبدالرحمن الحسينابي
عبدالرحمن الحسينابي

الصورة الرمزية عبدالرحمن الحسينابي



عبدالرحمن الحسينابي is on a distinguished road


افتراضي رد: الحسيناب ..اسفارهم و اشعارهم


.....قالت الراوية...كانت ست البنات طفلة صغيرة .....وكانت اثناء جلوسها تميل الي الخلف و الي الامام و ترددنقرتين لعرض الصورة في صفحة مستقلة ست البنات كدي....صلت علي النبي........)وكانت عائشة بنت الحاج تجاريها في ذلك....(زوزي زوزي براكي****ابوك شرد خلاكي..)
قال عمنا محمد مالك رحمه الله: (عبداللطيف...عبدالباقي ود ابنعوف....فضل ود حسين....فضل ود مصطفي... كانوا في طوكر....و لحق بهم محمدخير ود محمد ونحن وليدات...!!!) غير ان محمد خير عاد الي الشماليه ثم الي الجزيرة و عمل بالتجارة......
وفي سنه 1927 سافرت مجموعة اخري الي بورتسودان و اول هذه المجموعة عمنا عبد الرحيم فرح رحمه الله....قالت الراوية: توفيت بت الشوش الحاجة فاطمة بت جمال سليمان.....والدة ام الحسن فرح و لم تكن لهاا خت....ولا خالة بالحسيناب يوم ذاك...ثم سافر عبدالرحيم الي بورتسودان.....قالت ام الحسن:
درب العافي روح ياخزيني***يا حليل زولاً يطل فليل يجيني
عشاي يفتح جزلانو اب جيبين يديني..
ومابيحسب علي التدخل تجيني
ودعتك لله يا ود امي الزيني
يابا الشيخ حمد جدي اب عشماني
رفعت يدي راجي الله الوحداني
يجيب الشن طبعي وقام خلاني
لا اخيي معاي لا اماً تطراني
يا سيدي الحسن بندهلك اول
لي قمر العشي الفي مكة دور
تجيب ود امي في بيتو و يتختر
فشان افرشلي برشي و ادرش السكر.....
********
قلت: كانت عادة فرش البرش الاحمر دلاله علي الترحيب و الاحتفاء بالشخص....!!!! وعبد الرحيم فرح امه فاطمة بت جمال سليمان من جهات الغفاض....و لقبها بت الشوش.....كانت امراة شجاعة و قوية البنيه...فكانوا يكلفونها حراسة التمر......وهي التي عناها محمد احمد طه احمد (الاخ الشقيق لابناء طه ود احمد...توفي شاباًوسمي عليه محمد احمد العطا)


بت الشوش يا بت السوش.
تمر الساقي كلو كشوش
واحد بالحجر منقوش
وواحد بالطلوع محشوش.....!!
ثم لحق احمد الامين بعبد الرحيم........قالت...كان يوم سفر احمد الامين من الحسيناب يوماً عظيماً....و كذلك كان يوم عرسه....لماذا...؟؟؟؟
احمد الامين هو الرجل الوحيد حتي ذلك التاريخ في اسرته الذي كان شاباً و قادراً علي حمل العقاب...ولم يبق الا اعمامه الكبارمحمد نور و عتمان....و بنات عماته فاطمة..عائشة....و بفقده استشعرت الاسرة سعة الفجوه التي سيتركها....قالت الحاجة زينب الخضر(بنت فاطمة محمد نور بنت عمه)تخاطب الباخرة
يا ام دولاب اريت يومك ضلمه
شلتي البرمكي و خليتي ممه
ليش يا البسطي محنتي القبايل
شلتي البرمكي وخليتي المايل
الله من خلاني ريس في دولابا
الم في الكير اختها طابه طابة
فيشان خالك احمد ابو الامين شاشابا
اريت السكي تتقطع حبالا
تتكسر حديد ترقد مقالة
دحين يا البسطي اريت ما كنت جيتي
شلتي الاخدر الزي السوميتي.........!!!
(اما ممه) فهو محمد الامين محمد الامين...شقيق احمد الامين....توفي بالحسيناب في1 اكتوبر 1972مولم يتزوج وكان رجلاً زاهداً...وهو نفسه الذي عنته ب ( المايل)...........نشأ بين اعمامه طفلاً مدللاً و لخصوصية حالته كانوا يداعبونه بمثل هذه الاساليب...و كان يرد الصاع صاعين و يستقبلون كلامه بالرضا و الضحك.....يقول جدنا عتمان رحمه الله في ذات الحدث(سفر احمد الامين):-
حمّد نور اخوي شوف العجيبة
قصة (ممه) ما بنقدر نجيبا
ضهيبة محينة باللبن رفعت ضنيبا
و(ممه) خنيتي ما بيعرف حليبا
ومن شاي الحريم دايرلو شيبا
تور الدومي فوقك يا ضهيبه..!!
ضهيبه هي بقرة (محمد نور) و اطلق الاسم عليها (ممه) وقد ظلت بيد ه و تحت ادارته بقية من زريتها الي يوم و بعد وفاته....كانت بقرة بيضاء اللون تعلوها مسحات من سواد شاحب(غباش)...
ومن مجموعة بورتسودان المكي الجزولي.... (توفي بالحسيناب منتصف نهار الجمعة يوم 31/12/1976.....).ثم لحق بهم من الجزيرة عبد الرحيم عبد الله ولكنه عاد الي الجزيرة...ومن دبني (الشاويش)و احمد سعيد الفكي علي(امه فاطمة احمد محمد الامين وهي نفسها ام عبد الغفار عمر...امها الحرم بت عمر ود فضل) وقد بقي احمد سعيد ببورتسودان حتي تاريخ وفاته..و لا ذالت اسرته هناك.....

عبدالرحمن الحسينابي غير متواجد حالياً  
الحسيناب في قلوبنا
رد مع اقتباس
قديم 01-24-2011, 09:32 AM   #10
عبدالرحمن الحسينابي
عبدالرحمن الحسينابي

الصورة الرمزية عبدالرحمن الحسينابي



عبدالرحمن الحسينابي is on a distinguished road


افتراضي رد: الحسيناب ..اسفارهم و اشعارهم


لكن ابناء عبيد (موسي و الطيب) فانهما لم يسافرا بحثاً عن العمل..بل اخرجتهما الضرورة وعادا الي الحسيناب بانتهائها.....قال الراوي:
(وفي تاريخ قريب و قبل وفاة عاشة بت حمد خير زوجة حسين ود محمد..تور الطيب ود عبيد وتور عبدالرحمن يس انكتلن....تور الطيب كان في المطراب....وتور عبدالرحمن في الجزيري...سمعنا الكواريك....امي عاشة قالت اجرو شوفو العاضري شنو وتعالو...مات تور الطيب...وكان تحت اشراف موسي اخوه...فغضب موسي وقرر السفر من البلد لاول مرة في حياته.....قالت شقيقته عائشة عبيد:
انا لايمي الدهر دا ولا يمي جورو
وقتين السفر ساهل و يدورو
ووقتين الوليدات سافرولو
موسي لا شاف السفر ولا شاف بابورو
علي ود امو مالو مخفف دورو..؟؟
ابوك سيد البحلبن كان طبيق شول
ان بقي جا الثبات مو رزقك (التور)
*****
ود امو المعني هو الطيب.......وابوك سيد البحلبن.....اشارة الي ابيها عبيد...كان مولعاً بتربية الاغنام و رعايتها..و طبيق شول اي تحلب مرتين....
غير ان موسي لم يكن يرغب في السفر طويلاً لانه كان(عزيراً) و لا يقدر علي العمل بالاجر كرفاقه.....
قالت شقيقته فردوس:
سافر موسي مو قدر الدرادر
كسرة اللبقة ميها يجيهو دافر....
تعني ان يده واحدة......
قلت:راينا موسي وهو شيخ طاعن في السن ..وكانت يده اليسري بها اثر شق عميق يمتد من مفصل الساعد الامامي حتي باطن الكف...وكانت شبه مشلولة...يضعها او هي ثابتة مبسوطة من عند كتفه الايسر و حتي اسفل خاصرته اليمني...و لم نعلم لذلك سبباً....قيل لنا ان موسي كان رجل حفلات.....قال الراوينقرتين لعرض الصورة في صفحة مستقلةكانت الصفقة بالحلال....كل حلة تنافس الحلة الاخري في شدة الصفقة و اذكاء الحماس و نيل اعجاب الراقصات......وكان موسي وحده ينازل الحلة و الحلتين حتي اصابته عين في يده فتألمت....وترك اللعوبات...)
اما الطيب اخوه..فقد سافر حاملاً طفله محمد الطيب للعلاج...وكانت اصابته في رجله.....ولا ادري اسافر الي مروي المركز ام الي الخرطوم....ولكنه سافر لهذا السبب...قالت شقيقته عاشة عبيد:
اللوم اللوم و الملام
تاني اللوم و اللوم و الملام
لومي لي ابوات عبد السلام
وللصغير الشال طفلو قام
حصنن يا المهدي الامام...
و ابوات عبد السلام هما ودعمر و عبد الرحيم........و عبد السلام ابن محمد عبد الله عمر..توفي صغيراً.....
غير ان ذلك الصبي توفي الي رحمة الله و سمي عليه محمد الطيب عبيد الشاعر المتوفي في سنة1992...

عبدالرحمن الحسينابي غير متواجد حالياً  
الحسيناب في قلوبنا
رد مع اقتباس
إضافة رد

أدوات الموضوع
اسلوب عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 03:24 PM.


Powered by vBulletin® Version 3.8.5
Copyright ©2000 - 2014, Jelsoft Enterprises Ltd
::×:: جميع الحقوق محفوظة لشبكة ومنتديات الحسيناب ::×::
الآراء المنشورة ليس بالضرورة تعبر عن رأي إدارة المنتدي

a.d - i.s.s.w

SiteLock